მსახიობი, რეჟისორი და მწერალი გიორგი (გოგი) ხარაბაძე 81 წლის ასაკში გარდაიცვალა. ინფორმაცია რუსთაველის ეროვნულმა თეატრმა დაადასტურა. „რუსთაველის ეროვნული თეატრისთვის უდიდესი ტკივილია საქართველოს სახალხო არტისტის გოგი ხარაბაძის გარდაცვალება!“ – ვკითხულობთ თეატრის მიერ სოციალური მედიის მეშვეობით გამოქვეყნებულ განცხადებაში.
გოგი ხარაბაძე 1942 წლის 12 ივლისს დაიბადა. თეატრალური უნივერსიტეტის სამსახიობო ფაკულტეტის დასრულების შემდეგ, 1963-1994 წლებში იყო რუსთაველის ეროვნული თეატრის მსახიობი. მისი სამსახიობო შემოქმედებითი მოღვაწეობა არაერთ ცნობილ სპექტაკლსა და ფილმს აერთიანებს.
გოგი ხარაბაძემ სხვადასხვა დროს გამოსცა საავტორო წიგნები: „თქვენ მომაგონდით“, „კოქსართროზი“, „წყნარად, წარსულო, წყნარად“, „მოთხრობები და მიძღვნები“, „სისხლიანი მეოცე“, „პირველი“, „თამადა“, „სახლი რუსთაველზე“.
გოგი ხარაბაძე საქართველოს სახალხო არტისტის წოდებას ატარებდა. მას კულტურის სფეროს არაერთი ავტორიტეტული და მნიშვნელოვანი პრემია აქვს მიღებული.
