ჯერემი ალენ უაიტმა სერიალ The Bear-ში შეფ-მზარეულის როლის შესრულებისთვის ორი „ემი“ უკვე მოიგო, ახლა კი ოსკარის პირველი ნომინაციისთვის იბრძოლებს.
28 ოქტომბერს Disney-ს 20th Century Studios-მ პირველი კადრები გამოაქვეყნა, სადაც ჯერემი ალენ უაიტი ფილმ Deliver Me From Nowhere-ში თამაშობს. ბიოგრაფიული ფილმი მუსიკის ლეგენდის, ბრიუს სპრინგსტინის შესახებაა და ის 2025 წელს გამოვა.
ფოტოში ჯერემი ალენ უაიტი სპრინგსტინის სტილშია გამოწყობილი, მისი ტალღოვანი თმა კი ახალგაზრდა სპრინგსტინის გარეგნობას იდეალურად ესადაგება.
ფილმის Deliver Me From Nowhere-ის რეჟისორი და სცენარისტი სკოტ კუპერი გახლავთ. ფილმი ამავე სახელწოდების უორენ ზეინსის წიგნის ადაპტირებული ვერსიაა, თავად წიგნი კი ბრიუს სპრინგსტინის ალბომის, Nebraska-ს (1982) შექმნის ისტორიას მოგვითხრობს.
სანამ სპრინგსტინი 1984 წელს ალბომ Born in the U.S.A.-ის გამოშვებით ამერიკული კულტურის ერთ-ერთ ყველაზე გავლენიან სახედ იქცეოდა, აკუსტიკური ალბომი Nebraska გამოსცა. ეს არის მელანქოლიური ჩანაწერების კრებული, რომელმაც ბილბორდ 200-ში მესამე ადგილი დაიკავა. ალბომი შეიცავს სინგლებს: Atlantic City და Open All Night.
ფილმში Deliver Me From Nowhere მსახიობ ჯერემი ალენ უაითის გარდა ემის ჯილდოს მფლობელი პოლ უოლტერ ჰაუზერი და ავსტრალიელი მსახიობი ოდესა იანგიც იღებენ მონაწილეობას. გამოცემა Variety-ს თქმით, ამ ფილმში როლის შესრულებით „ემის“ ჯილდოს მფლობელი ჯერემი სტრონგიც არის დაინტერესებული.
ფილმის პროდიუსერები არიან ელენ გოლდსმიტ-ვეინი, ერიკ რობინსონი და Netflix Films-ის ყოფილი ხელმძღვანელი სკოტ სტუბერი, რომლისთვისაც Netflix-ის შემდეგ ეს პირველი მნიშვნელოვანი პროექტი იქნება. გამოცემა Deadline-ის ცნობით, ბრიუს სპრინგსტინი და მისი მენეჯერი ჯონ ლანდაუ ფილმის შემოქმედებით პროცესში აქტიურად არიან ჩართულნი.
აღსანიშნავია, რომ ბილბორდ 100-ის ათეულში ბრიუს სპრინგსტინის თორმეტი ჰიტია მოხვედრილი, მათ შორისაა: 1980 წელს – Hungry Heart (მე-5 ადგილი), 1985-ში – Glory Days (მე-5 ადგილი) და 1994 წელს – Streets of Philadelphia (მე-9 ადგილი). ამ უკანასკნელს იმავე წელს საუკეთესო ორიგინალური სიმღერის ნომინაციაში „ოსკარი“ მიენიჭა. ბილბორდ 200-ის ჩარტში ბრიუს სპრინგსტინის 11 ალბომი პირველ ადგილს იკავებს, მათ შორის: Tunnel of Love (1987), The Rising (2002) და High Hopes (2014).
მარკ სელიგერი/20th Century Studios
