17 მარტს 2025 წლის iHeartRadio Music Awards-ზე ბენსონ ბუნის ჰიტი Beautiful Things წლის სიმღერად დასახელდა. ეს პირველი შემთხვევაა, როდესაც ამ კატეგორიაში მამაკაცი არტისტი იმარჯვებს, მას შემდეგ, რაც The Weeknd-მა 2021 წელს Blinding Lights-ისთვის იგივე პრიზი მოიგო.
ბუნის ამ გამარჯვებამ გარკვეულწილად დააბალანსა 2025 წლის გრემის დაჯილდოებაზე მისი შედარებით მოკრძალებული შედეგი. ის მხოლოდ ერთ კატეგორიაში, საუკეთესო ახალი არტისტის ნომინაციაზე იყო წარდგენილი. მიუხედავად ამისა, გრემის ცერემონიაზე არტისტის მუსიკალური ნომერი საღამოს ერთ-ერთი ყველაზე განხილვადი მომენტი გახდა.
iHeartRadio Music Awards-ზე წლის ალბომად ბილი აილიშის Hit Me Hard and Soft დასახელდა. ეს ალბომი გრემის 2025 წლის დაჯილდოებაზეც იყო წარდგენილი იმავე კატეგორიაში, მაგრამ ჯილდო Beyoncé-ს Cowboy Carter-მა მოიპოვა.
წლის წარმატებული ახალბედა არტისტის ჯილდო გრეისი აბრამსმა მოიპოვა. სამადლობელ სიტყვაში მან განსაკუთრებულად მოიხსენია ოთხი არტისტი, რომლებმაც მას საკუთარ ტურნეებზე სცენა გაუზიარეს. ესენი არიან: ტეილორ სვიფტი, ოლივია როდრიგო, ნოა კაანი და ჯგუფი The National.
SZA-მ ზედიზედ მესამედ მოიგო წლის R&B არტისტის ჯილდო, რითაც ამ კატეგორიაში ახალი რეკორდი დაამყარა. მან H.E.R.-ს გადაასწრო, რომელსაც ეს ტიტული ორჯერ აქვს მოგებული.
წლის ქანთრი არტისტად ჯელი როლი დასახელდა. ერთი წელი გავიდა მას შემდეგ, რაც მან ახალი ქანთრი არტისტის ჯილდო მოიგო. GloRilla წლის ჰიპ-ჰოპ არტისტი გახდა, საბრინა კარპენტერმა კი წლის პოპ არტისტის ჯილდო პირველად მოიპოვა. წლის ალტერნატიული არტისტის ჯილდო ჯგუფ Green Day-ს გადასცეს. ბენდმა ამ ნომინაციაში პირველად გაიმარჯვა.
საპატიო ჯილდოების მფლობელები სამი გავლენიანი ქალი არტისტი გახდა: ლედი გაგა, მერაია ქერი და ტეილორ სვიფტი. სვიფტმა 2025 წლის iHeartRadio Music Awards-ზე საერთო ჯამში 9 ჯილდო მოიპოვა.
iHeartRadio Music Awards-ის მე-12 დაჯილდოება არჩევს იმ არტისტებსა და სიმღერებს, რომლებიც 2024 წლის განმავლობაში ყველაზე ხშირად გაჟღერდა iHeartRadio-ს სადგურებსა და აპლიკაციაში. ცერემონია 17 მარტს ლოს-ანჯელესში, Dolby Theatre-ში გაიმართა. ღონისძიება პირდაპირ ეთერში FOX-ის საშუალებით გადაიცემოდა. ცერემონია ასევე გადაიცემოდა iHeartRadio-ს სადგურების ეთერით და iHeartRadio-ს აპლიკაციით.
გამარჯვებულები გამოვლინდნენ მსმენელების ხმის მიცემის შედეგადაც. წელს ფანების გადაწყვეტილებამ განსაზღვრა შემდეგი კატეგორიების გამარჯვებულები: საუკეთესო
საუნდტრეკი, საყვარელი ბროდვეის დებიუტი, საყვარელი K-pop საცეკვაო გამოწვევა, საყვარელი სიურპრიზი სტუმარი, საყვარელი ტურნეს ტრადიცია. ასევე, გულშემატკივრებმა აირჩიეს გამარჯვებულები ხუთი კატეგორიიდან: საუკეთესო ტექსტი, საუკეთესო მუსიკალური ვიდეო, რჩეული ტურნეს სტილი, რჩეული ტურნეს ფოტოგრაფი, ფავორიტი ეკრანული შესრულება
იხილეთ 2025 iHeartRadio Music Awards-ის ნომინაციებისა და გამარჯვებულების სრული სია.
