„ტრონი” დაბრუნდა. ახლახან დისნეიმ Tron: Ares-ის პირველი ტრეილერი გამოაქვეყნა. ფილმი „ტრონის” ფრენჩაიზის მესამე ნაწილია, რომელიც მოჰყვება ორიგინალ, 1982 წლის სამეცნიერო ფანტასტიკას Tron და მის 2010 წლის სიქველს Tron: Legacy.
ტრეილერში წარმოდგენილია ბნელი, პირქუში სურათი, სადაც რეალობა და ვირტუალური სამყარო ერთმანეთს ეჯახება. წუთნახევრიანი ვიდეო იწყება სცენით, რომელშიც პოლიცია პროგრამულად მართულ ფუტურისტულ მოტოციკლეტებს მისდევს. ტრეილერის ბოლოს კი ისმის ჯეფ ბრიჯისის ხმა, რომელიც იმეორებს კევინ ფლინის პერსონაჟს ორიგინალი ფილმიდან: „მზად ხარ? რადგან არ არსებობს უკან დასახევი გზა”. ამ დროს კი ვხედავთ ჯარედ ლეტოს არესის პერსონაჟს, რომელიც ვირტუალურიდან რეალურ სამყაროში ცოცხლდება.
ფილმში, რომლის საუნდტრეკზეც Nine Inch Nails-მა იმუშავა, ასევე თამაშობენ: ევან პიტერსი, გრეტა ლი, ჯოდი ტერნერ-სმითი, კამერონ მონაგანი, სარა დეჟარდენი, ჰასან მინაჯი, არტურო კასტრო და ჯილიან ანდერსონი. ფილმის რეჟისორი ხოაკიმ რონინგია. Tron: Ares კინოთეატრებში 10 ოქტომბერს გამოვა.
Daft Punk-ს ეკუთვნის ფილმის წინამორბედის, Tron: Legacy-ს საუნდტრეკი, რომელიც Billboard 200-ის ალბომების ჩარტში მეოთხე ადგილზე გავიდა.
ინფორმაცია, რომ Tron: Ares-ზე Nine Inch Nails იმუშავებდა, ტრენტ რეზნორმა და ატიკუს როსმა 2024 წელს თავად დაადასტურეს. წლების განმავლობაში დუეტს არაერთი ფილმის საუნდტრეკი შეუქმნიათ, მათ შორის არის Challengers, Teenage Mutant Ninja Turtles: Mutant Mayhem, Soul და The Social Network. თუმცა Tron: Ares პირველი ნამუშევარი იქნება, რომელშიც ოსკაროსანი დუეტი Nine Inch Nails-ის სახელით წარდგება.
ნახეთ Tron: Ares-ის პირველი ტრეილერი:
