ბილი აილიში ბრიტანული Vogue-ის მაისის ნომრის გარეკანზეა. გამოცემისთვის მიცემულ ინტერვიუში ვარსკვლავმა თქვა, რომ ბავშვობაში თავის სახელს „ვერ იტანდა“.
ბილის ათეულობით ცნობილმა მეგობარმა დაუსვა შეკითხვები. მათ შორის იყვნენ საბრინა კარპენტერი, ჩაპელ როუნი, SZA და გრეტა გერვიგი. თუმცა ყველაზე გულწრფელი ის მაშინ აღმოჩნდა, როდესაც იდრის ელბამ ჰკითხა, ბავშვობაში საკუთარი უჩვეულო სახელით ამაყობდა, თუ არა. „ბავშვობაში ჩემი სახელი საშინლად არ მომწონდა. ყოველდღე მესმოდა, რომ ბილი ბიჭის სახელია,” – უპასუხა ოსკაროსანმა არტისტმა.
„ზუსტად მახსოვს, როგორ ვბრაზობდი და მთელი გულით მინდოდა, ქალური სახელი მქონოდა – ვაიოლეტი, ლავანდა, ანუ ისეთი, ყვავილივით ლამაზი. უცნაურია, მაგრამ ახლა მგონია, რომ ბილის გარდა სხვა არცერთი სახელი არ შემეფერება. უზომოდ მიყვარს. ეს არის ერთადერთი სწორი სახელი იმ ადამიანისთვის, ვინც ვარ.“
ბილი აღნიშნავს, რომ ეს სახელი ბაბუის – უილიამის პატივსაცემად შეარქვეს. ვარსკვლავის თქმით, სახელთან დაკავშირებით თვითშეფასება უფრო მას შემდეგ მოემატა, რაც აღმოაჩინა, რომ მისი ერთ-ერთი საყვარელი სერიალის მსახიობსაც ბილი ერქვა. „პირველი ქალი ბილი, რომელიც გამახსენდა, ბილი პაიპერი იყო Doctor Who-დან,“ – უთხრა აილიშმა გამოცემას. „Doctor Who ძალიან მიყვარდა და როცა ეს გავიგე, ძალიან, ძალიან გამიხარდა. მაგრამ იმავდროულად გავბრაზდი კიდეც – რატომ უნდა წარმოიდგინონ ვიღაც სხვა, როცა ჩემი სახელი ესმით?! ეს მიუღებელია!“
მიუხედავად იმისა, რომ ახლა თავისი სახელი მთელი გულით უყვარს, ბილიმ ინტერვიუში ისიც აღნიშნა, რომ ჯერ კიდევ ებრძვის თვითშეფასების პრობლემას. ნიკი მინაჟმა აილიშისათვის კითხვის დასმისას აღნიშნა, რომ შეუმჩნევია, თუ „როგორ გრძნობს ბილი თავს უხერხულად თავისი სილამაზის გამო”. მინაჟმა აილიშს ჰკითხა, ღელავს თუ არა, რომ გარეგნობამ შეიძლება მისი მუსიკა დაჩრდილოს, რაზეც ბილიმ უპასუხა: „ნიკი, ამ კითხვამ ცოტა ამატირა.“
„ცხოვრებაში თავი ლამაზად თითქმის არასდროს აღმიქვამს. ასე რომ, არც ის მიფიქრია ოდესმე, რომ ეს მუსიკაზე იმოქმედებდა,” – უპასუხა აილიშმა.
ინტერვიუ რამდენიმე დღეში, მას შემდეგ დაიბეჭდა, რაც ბილი აილიში Coachella-ს სცენაზე მოულოდნელად შეუერთდა Charli XCX-ს. მათ ერთად შეასრულეს ჰიტი Guess, რომელმაც Billboard Hot 100-ის ჩარტის მე-12 პოზიცია დაიკავა. მოგვიანებით Charli XCX-მა ინსტაგრამზე გამოაქვეყნა ფოტო, რომელშიც ბილისთან ერთად ტროი სივანი და ლორდეც ჩანან.
ბილი აილიშის მესამე სტუდიური ალბომი Hit Me Hard and Soft 2024 წლის მაისში გამოვიდა და Billboard 200-ის ჩარტის მეორე ადგილი დაიკავა.
