Tyler, the Creator კვლავ გაერთიანდა Converse-თან პროექტ 1908 Program-ის ფარგლებში, რათა ბრენდის არქივული დიზაინები თავისი ხედვით ხელახლა გაეცოცხლებინა. ტაილერის კოლექცია გაყიდვაში 20 ივნისს ჩაეშვება. იგი მოიცავს Naut-1 და Coach Jogger მოდელების თანამედროვე ვერსიებს, თუმცა ამავდროულად ინარჩუნებს Converse-ის ტრადიციულ ესთეტიკას.
Naut-1 მოდელი 1970-80-იან წლებში მოზარდების გარდერობის განუყოფელი ნაწილი იყო. ტაილერის ვერსია ამ კლასიკურ სპორტულ ფეხსაცმელს ახლებური ვიზუალით წარმოგვიდგენს – დაბალყელიანი მოდელი, რომლის ფერთა პალიტრაში შედის ცისფრისა და ყავისფრის კომბინაცია. ზოგიერთი მოდელის დიზაინში ცხოველების პრინტებს შევხვდებით, ზოგ შემთხვევაში კი – ვარდისფერ ყვავილებს.
Converse
რაც შეეხება Coach Jogger-ს, მისი თავდაპირველი ვერსია 1976 წელს გამოჩნდა. ტაილერის ინტერპრეტაციით შექმნილ დიზაინში გამოყენებულია მუქი წითელი, მწვანე, პასტელური ცისფერი და ოქროსფერი კომბინაციები.
კოლექციის შეძენა მსოფლიოს მასშტაბით 20 ივნისიდან, Converse-ის ვებგვერდზე იქნება შესაძლებელი. თუმცა, ლოს-ანჯელესში 12 ივნისს ექსკლუზიურად გაიხსნება 1908 Pop-Up მაღაზია, სადაც მომხმარებლები შეძლებენ, პირველებმა იხილონ ტაილერის დიზაინერული ხედვა.
რაც შეეხება მუსიკალურ საქმიანობას – ამჟამად Tyler, the Creator ევროპულ ტურნეშია. Chromakopia Tour-ის ფარგლებში ის ლონდონში იმყოფება, შემდეგ კი კონცერტებს გამართავს დუბლინში, მანჩესტერსა და გლაზგოში.
ტაილერი შეერთებულ შტატებს Governors Ball-ის ფესტივალზე დაუბრუნდება, რომელიც 6 ივნისს ნიუ-იორკში, Queens-ში გაიმართება. არტისტი ფესტივალის ერთ-ერთი მთავარი ჰედლაინერია. Tyler, the Creator-ის ტურნე შეერთებულ შტატებშიც გაგრძელდება და მოიცავს ისეთ ქალაქებს, როგორებიც არის: ცინცინატი, ნიუ-იორკი, კლივლენდი, ჩიკაგო, ტორონტო, ბალტიმორი, დეტროიტი და ფილადელფია.
