16 ნოემბერს თბილისში, ძველ სპორტის სასახლეში, როკის ცოცხალი ლეგენდის, Deep Purple-ის კონცერტი გაიმართება. ეს არის უნიკალური შესაძლებლობა მსმენელისთვის, ცოცხლად მოისმინოს როკ-კორიფეების შთამბეჭდავი შესრულება, რომელთა შემოქმედებამ მუსიკალური ცნობიერება ჩამოაყალიბა. Deep Purple კარიერის ფარგლებში ბოლო მსოფლიო ტურნეს მართავს.
აღსანიშნავია, რომ კონცერტი REDIUM-ის ორგანიზებით იმართება:
„ეს იქნება წლის ყველაზე მასშტაბური და ემოციური მუსიკალური მოვლენა. ჩვენთვის დიდი პატივია, რომ Deep Purple-ის ტურნე თბილისსაც მოიცავს. მსგავსი გამოცდილება ნამდვილმა მელომანმა არ უნდა გამოტოვოს,“ – განაცხადა REDIUM-ის დამფუძნებელმა Billboard Georgia-სთან საუბარში.
1968 წელს ჩამოყალიბებული ბრიტანული ბენდი Deep Purple მუსიკის ისტორიაში ერთ-ერთ ყველაზე გავლენიან როკ-ჯგუფად ითვლება.
57-წლიანი მუსიკალური კარიერის განმავლობაში მათი საკონცერტო პერფორმანსები ტექნიკური სიზუსტით, სცენური იმპროვიზაციით, ქარიზმით და ენერგიით არის გამორჩეული.
დღესდღეობით ჯგუფს მთელ მსოფლიოში 100 მილიონზე მეტი ალბომი აქვს გაყიდული. 2016 წელს Deep Purple როკ-ენ-როლის დიდების დარბაზში შეიყვანეს. მათი ალბომები რეგულარულად ხვდებოდა ბრიტანეთის და აშშ-ის ჩარტებში (Billboard 200), სადაც განსაკუთრებული წარმატება მოიპოვეს ალბომებმა Machine Head (1972), Made in Japan (1972) და Perfect Strangers (1984). ბენდის ცნობილი ჰიტებია: Smoke on the Water, Highway Star, Hush, Burn, Child in Time და Perfect Strangers, Women from Tokyo და სხვ. – ეს არის სიმღერები, რომლებიც არასდროს კარგავენ აქტუალობას და დღემდე რჩებიან გლობალური ჩარტებისა და რადიოეთერების განუყოფელ ნაწილად.
თბილისში 16 ნოემბერს დაგეგმილი Deep Purple-ის კონცერტი არა მხოლოდ გრანდიოზული მუსიკალური მოვლენა, არამედ ერთგვარი კულტურული გამოცდილებაა, – შეხვედრა მუსიკის ისტორიის ცოცხალ ლეგენდებთან, რომელთა სიმღერებიც თაობებს აერთიანებს.
მოემზადეთ წლის ყველაზე გამორჩეულ ღონისძიებაზე დასასწრებად. Deep Purple-ის კონცერტის ბილეთების შეძენა Biletebi.ge-ს საშუალებით არის შესაძლებელი.
