კოლუმბიელი მომღერალი, სებასტიან იატრა თავისი 2021 წლის კომპოზიციის Tacones Rojos რემიქს ვერსიას ავრცელებს, რომელშიც ცნობილი ამერიკელი მუსიკოსი, ჯონ ლეჯენდი მონაწილეობს.
“როდესაც გაქვს სიმღერა, რომელიც ძალიან გიყვარს, გინდა, ისეთი გენიალურ არტისტს ჩააწერინო, როგორიც ჯონია, რომელიც ნამუშევარს არა მხოლოდ თარგმნის, არამედ არსსაც შეუნარჩუნებს”, – აღნიშნა იატრამ გამოცემა Billboard-თან ორენოვან კომპოზიციაზე საუბრისას.
“ჯონი წარმოუდგენლად ნიჭიერია და შეუზღუდავი მუსიკალური შესაძლებლობები აქვს. არტისტის ვოკალური დიაპაზონის გათვალისწინებით, ძალიან საინტერესოა ის, თუ როგორ ჟღერს მისი ხმა მსგავს კომპოზიციაში”, – ამბობს სებასტიან იატრა.
Tacones Rojos ეძღვნება ქალს, რომელიც მომნუსხველი და ლამაზია, განსაკუთრებით მაშინ, როდესაც წითელი მაღალქუსლიანი ფეხსაცმელი აცვია. ჯონ ლეჯენდმა ინგლისურენოვანი ტექსტი დაწერა სიმღერისთვის, რომელიც იატრამ თავდაპირველად ხუან ხოსთან, ლოფთისთან, მანუელ ლარასა და პაბლოსთან ერთად შექმნა.
“ძალიან ლამაზი და მზიანი განწყობა მოაქვს. ის ახალ ადამიანთან შეხვედრის შესახებაა, რომელსაც სიყვარული, სინათლე და აღმაფრენა შემოაქვს შენს ცხოვრებაში. მიყვარს ეს ენერგია და ის, რომ ამ მშვენიერი ნამუშევრისთვის ერთობლივი ძალებით რაღაც ახლის დამატება შევძელით”, – განაცხადა ჯონ ლეჯენდმა კომპოზიციაზე საუბრისას.
