ცნობილი ბრიტანელი მომღერალი, ჰარი სტაილზი თავისი მომავალი ალბომიდან Harry’s House პირველ სინგლს აანონსებს. როგორც არტისტმა სოციალურ ქსელ ტვიტერზე დაწერა, ნამუშევარი As It Was მუსიკალურ პლატფორმებზე 1 აპრილს გავრცელდება.
As It Was. April 1. pic.twitter.com/CzCFK7f3pA
— Harry Styles. (@Harry_Styles) March 28, 2022
სტაილზმა ახალი, 13-ტრეკიანი ალბომი 23 მარტს დააანონსა. მანამდე 28 წლის პოპვარსკვლავის თაყვანისმცემლებმა შენიშნეს, რომ ჰარიმ სოციალურ ქსელებში ანგარიშები სახელწოდებით You Are Home გამოიწერა. მათ აგრეთვე აღმოაჩინეს ვებგვერდი YouAreHome.co, რომლის ერთადერთ გვერდზე გამოსახული კარის გახსნის შემდეგ ყოველდღიურად ახალი სურათის ნახვაა შესაძლებელი.
იმის მიუხედავად, რომ სიმღერის As It Was შესახებ დეტალები არ გავრცელებულა, ფანები ფიქრობენ, რომ ტვიტერის გვერდი You Are Home კომპოზიციიდან ფრაზებს აქვეყნებს.
in this world, it’s just us, you know it’s not the same as it was
— You Are Home (@youarehome) March 21, 2022
მუსიკოსი ფართო საზოგადოებამ 2010 წელს ბოიბენდში One Direction მოღვაწეობით გაიცნო. 2017 წელს მან სადებიუტო სტუდიური ალბომი Harry Styles გამოუშვა, რომელსაც Billboard 200-ის ჩარტში პირველი ადგილი ერგო. 2019 წელს იგივე შედეგი ჰარის მეორე ნამუშევარმა Fine Line გაიმეორა. 2021 წელს არტისტმა სიმღერით Watermelon Sugar გრემიზე საუკეთესო პოპ სოლო შესრულების ნომინაციაში გაიმარჯვა. აღსანიშნავია, რომ სტაილზი პირველი მამაკაცია, რომელიც ჟურნალ Vogue-ის ყდაზე მარტო დაბეჭდეს.
