ჩიკაგოში, Kid Cudi-სა და Kanye West-ის სცენაზე გაერთიანება მათი რამდენიმეწლიანი პაუზის შემდეგ პირველი ერთობლივი ცოცხალი შესრულება იყო. თუმცა Kid Cudi-ს მხრიდან Ye-ს მიმართ გამოხატული ეს დამოკიდებულება ყველას არ გახარებია.
4 სექტემბერს, Soldier Field-ზე გამართული სამსაათიანი შოუს მიწურულს, Ye-მ Cudi სცენაზე სამი სიმღერისთვის მიიწვია. რეპერებმა, რომელთა ურთიერთობაც ორ ათწლეულს ითვლის, შეასრულეს „Father Stretch My Hands, Pt. 1”, „Ghost Town” და „Pursuit of Happiness (Nightmare)”, რაც შოუს ერთ-ერთ ყველაზე დაუვიწყარ მომენტად იქცა.
შოუს შემდეგ Cudi სოციალურ ქსელებში გამოეხმაურა დადებით გამოხმაურებებს ფანებისგან, რომლებიც აღფრთოვანებულნი იყვნენ ამ მოულოდნელი გაერთიანებით. მან ასევე უპასუხა კრიტიკას Ye-სთან ურთიერთობის აღდგენის გამო.
ბოლო წლებში Cudi-მ დისტანცირება არჩია Ye-ს განცხადებების, ანტისემიტური რეპლიკებისა და სიძულვილის ენის გამო. აღსანიშნავია, რომ უესტმა ამ განცხადებების გამო მოგვიანებით ბოდიშიც მოიხადა.
Cudi გამოეხმაურა ნიუ-იორკელი რადიოწამყვანის, პიტერ როზენბერგის პოსტს X-ზე. როზენბერგმა უკმაყოფილება გამოთქვა იმის გამო, რომ ბევრი ადამიანი, ვინც ასე უყვარს და პატივს სცემს, კანიეს მიმართ ლოიალობას იჩენს, რაც უხერხულია. „არ ვამბობ, რომ არავინ იმსახურებს პატიებას ან ემპათიას, მაგრამ ამ კაცმა სულ რაღაც ერთი წლის წინ Heil Hitler იმღერა,” – დაწერა მან.
„მესმის შენი გულისწყრომა, პიტერ, პატივს გცემ, მაგრამ ნამდვილად არ მაინტერესებს, ჩემით იმედგაცრუებული თუ ხარ. ეს კაცი ჩემი ძმაა. შენ მასთან ისეთი ურთიერთობა არ გაქვს, როგორიც მე. თითქმის 20 წლის ხელოვნება და მეგობრობა გვაკავშირებს. Ye-სთან ვიყავი და გულწრფელად ვიტყვი – მასთან ახლა საუბარი ზუსტად ისეთივეა, როგორიც მაშინ, როცა მასთან კონტრაქტი პირველად გავაფორმე, უკეთესიც კი. ის წლები ებრძოდა ფსიქიკური ჯანმრთელობის პრობლემებს და ახლა კარგადაა. ოჯახის წევრებს ყველამ უნდა მისცეს შანსი. მე ყველაზე მკაცრი ვიყავი მის მიმართ, პასუხისმგებლობას ვთხოვდი. მან ბოდიში მოიხადა და ეს გულწრფელი იყო. მაგრამ როგორც ვთქვი, შენ მისი ოჯახი არ ხარ, ასე რომ მესმის,” – უპასუხა Kid Cudi-მ სოციალურ ქსელში.
როზენბერგმა უპასუხა: „შენით არ ვიყავი იმედგაცრუებული, ფანებს ვგულისხმობდი, მაგრამ შენც რომ გენახე, როგორ ვუჭერ მხარს არტისტს, რომელმაც ერთი წლის წინ გამოუშვა სიმღერა სახელწოდებით all hail the klan, ალბათ შენც რეაქცია გექნებოდა. მე სრულიად მომხრე ვარ პატიების და ემპათიის, მაგრამ ამ კაცს გმირად აცხადებენ… ეს წაროუდგენელია. წავიდეს, რეალური დახმარება მიიღოს, რამდენიმე წელი ჩამოშორდეს ყველაფერს და მერე ვისაუბროთ, სანამ მის ჯიბეში ფულის ჩასადებად გაქცევას დავიწყებ“.
2025 წელს, CBS-თან ინტერვიუში, Kid Cudi-მ ისაუბრა Ye-სთან გაფუჭებულ ურთიერთობაზე და აღნიშნა, რომ უესტმა თქვა რაღაცები, „რის შემდეგაც უკან დასაბრუნებელი გზა აღარ არსებობდა“. მან დაამატა: „შენთან დავასრულე. ეს გულს მიკლავს, რადგან კანიე მიყვარდა. მართლა მიყვარდა. ის ჩემი ცხოვრების ცვლილების ნაწილი იყო და გარკვეულ ეტაპზე ძალიან კარგი მეგობარიც, მაგრამ ის კაცი, ვინც გახდა… მე უბრალოდ არ ვიცნობ ამ ადამიანს“.
Ye-მ, რომელსაც ბიპოლარული აშლილობის დიაგნოზი აქვს, 2026 წლის დასაწყისში მოიხადა ბოდიში თავისი ქმედებების გამო და ყურადღება ფსიქიკურ ჯანმრთელობაზე გაამახვილა. იანვარში, Wall Street Journal-ში გამოქვეყნებულ განცხადებაში Ye წერდა: „არ გგონია, რომ ავად ხარ. გგონია, რომ ყველას ზედმეტი რეაქცია აქვს. გრძნობ, რომ სამყაროს იმაზე მკაფიოდ ხედავ, ვიდრე ოდესმე, როცა რეალურად კონტროლს სრულად კარგავ… 1-ელი ტიპის ბიპოლარული აშლილობის ერთ-ერთი ყველაზე რთული ასპექტი რეალობას აცდენილი მომენტებია, რომელთაგან ბევრი დღესაც არ მახსოვს. ამას მცდარ გადაწყვეტილებებამდე და იმპულსურ ქცევამდე მივყავართ, რაც ხშირად სხეულიდან გასვლის გამოცდილებას ჰგავს. ვნანობ და სიღრმისეულად განვიცდი იმ მდგომარეობაში ჩადენილ ქმედებებს. მზად ვარ პასუხისმგებლობისთვის, მკურნალობისთვის და რეალური ცვლილებებისთვის. თუმცა ეს არ ამართლებს იმას, რაც გავაკეთე. მე არ ვარ ნაცისტი ან ანტისემიტი. მე მიყვარს ებრაელი ხალხი“.
ზაფხულში Cudi-მ გააზიარა, რომ ისინი მეგობრობის აღდგენაზე მუშაობდნენ.
ამ შაბათ-კვირას, Ye-სთან ერთად სცენაზე გამოჩენის შემდეგ, მან X-ზე დაწერა: „დღევანდელი საღამო უბრალოდ კიდევ ერთი ეპიკური ღამე იყო ჩემს უფროს ძმასთან ერთად გატარებული ეპიკური ღამეების სიაში. მიყვარხარ, ჩიკაგო“.
