მას შემდეგ, რაც სამხრეთკორეული ჯგუფის BTS წევრებმა განაცხადეს, რომ სოლო პროექტებზე აპირებდნენ მუშაობას, ჯონგუქმა ამერიკელი მომღერლის, ჩარლი პუტის კომპოზიციაში Left and Right მიიღო მონაწილეობა.
• ნახეთ: BTS სინგლის Yet to Come ანიმაციურ ვიდეორგოლს ავრცელებს
დუეტის განცხადებით, ახლო მომავალში სიმღერაზე გადაღებული ფერადი ვიდეორგოლი გავრცელდება. არტისტებმა კლიპის თიზერიც გამოაქვეყნეს. ეს რიგით მესამე სიმღერაა, რომელიც ჩარლიმ მიმდინარე წელს გამოუშვა. აღსანიშნავია, რომ მას მესამე სტუდიური ალბომი Charlie აქვს დაანონსებული. იანვარში პუტმა სინგლი Light Switch გამოსცა, რომელიც ბილბორდის ცხელ ასეულში 27-ე პოზიციაზე გავიდა. მომდევნო ტრეკი აპრილში გავრცელებული That’s Hilarious გახლდათ.
ნიუ ჯერსელმა ჩარლი პუტმა შემოქმედებითი მოღვაწეობა 2009 წელს დაიწყო. თავდაპირველად ის კომპოზიციებს სხვა არტისტებისთვის წერდა, 2015 წელს კი Atlantic Records-თან გააფორმა კონტრაქტი, რის შემდეგაც სადებიუტო სინგლი Marvin Gay გამოუშვა. მომდევნო ტრეკი See You Again, რომელიც თანალეიბლელ უიზ ქალიფასთან ერთად შექმნა ფილმისთვის Furious 7, ბილბორდის ცხელი ასეულის პირველ ადგილზე ზედიზედ 12 კვირის განმავლობაში დარჩა. მომღერალმა ალბომი Nine Track Mind 2016 წელს გამოსცა, მასში ჰიტები One Call Away და We Don’t Talk Anymore იყო წარმოდგენილი. ჩარლის მეორე ჩანაწერმა Voicenotes კი კრიტიკოსთა მოწონება და ბილბორდის ჩარტში მეოთხე ადგილი დაიმსახურა.
