ამერიკელმა პოპვარსკვლავმა, ტეილორ სვიფტმა ახალი სინგლი Carolina გამოუშვა, რომელიც ფილმის Where the Crawdads Sing საუნდტრეკია. სიმღერის მოსმენა აქამდე მხოლოდ ნაწყვეტებად, კინოსურათის თრეილერებში იყო შესაძლებელი.
ფილმში მსახიობ დეისი ედგარ ჯონსის პერსონაჟი, კია ჩრდილოეთ კაროლინის ჭაობიან ადგილებში ცხოვრებას სწავლობს, მას შემდეგ, რაც მშობლები მიატოვებენ, მოგვიანებით კი საყვარელი ადამიანის მკვლელობაში დაადანაშაულებენ.
როგორც ტეილორმა მიმდინარე წლის მარტში ინსტაგრამზე აღნიშნა, მან სიმღერა მას შემდეგ შექმნა, რაც დელია ოუენსის წიგნი Where the Crawdads Sing წაიკითხა.
პენსილვანიელმა ტეილორ სვიფტმა შემოქმედებითი მოღვაწეობა 2004 წელს დაიწყო. 20 წლის ასაკში მან გრემის პირველი ჯილდო მიიღო და, ბილი აილიშის გამარჯვებამდე, ოქროს გრამოფონის ყველაზე ახალგაზრდა მფლობელის სტატუსს ატარებდა. 11 გრემის მქონე მუსიკოსს კარიერის განმავლობაში 200 მილიონზე მეტი ჩანაწერი აქვს გაყიდული. გამოცემა Time-მა ის წლის ყველაზე გავლენიან ადამიანად სამჯერ, 2010, 2015 და 2019 წლებში დაასახელა. ტეილორს 9 სტუდიური ალბომი აქვს გამოშვებული, რომელთაგან რვა Billboard 200-ის ჩარტის სათავეში მოხვდა.
