2020 წლის საპრეზიდენტო არჩევნებში წარუმატებელი კენჭისყრის შემდეგ, კანიე უესტი 2024 წელს, კვლავ აპირებს არჩევნებში მონაწილეობის მიღებას.
კანიე უესტმა განაცხადა, რომ მის საარჩევნო კამპანიაზე ალტერნატიული მემარჯვენე პოლიტიკოსი – მილო იანოპულოსი იზრუნებს. იანოპულოსი ახალი ამბების ულტრა-მემარჯვენე გამოცემა Breitbart-ის მთავარი რედაქტორი იყო, ბოლოს კი, რესპუბლიკელ კონგრესმენ, მარჯორ ტეილორ გრინითან მუშაობდა.
სოციალურ მედიაში კანიე უესტს და მილო იანოპულოსს პოლიტიკური თანამშრომლობის შესახებ ინფორმაცია ჯერ არ გაუჟღერებიათ.
2020 წლის 4 ივლისს, გრძელვადიანი საპრეზიდენტო კამპანიის დაწყება რეპერმა „დაბადების დღის წვეულების“ ბანერით გამოაცხადა. მას შემდეგ, რაც პარტია დაგვიანებით დაარეგისტრირა, კანიე უესტმა კენჭისყრის შედეგად ჯამში 70, 000 ხმა მიიღო.
ეს წელი კანიე უესტისტთვის რთული და სადავო იყო. ანტისემიტური განცხადებებით დაწყებული, რომელსაც კიმ კარდაშიანის ყოფილი ბოიფრენდის – პიტ დევიდსონის მისამართით ძალადობრივი რიტორიკა მოჰყვა, დამთავრებული White Lives Matter-ის მაისურით გამოწვეული სკანდალით. ეს მაისური მომღერალს პარიზის მოდის კვირეულზე Yeezy-ის ხაზის პრემიერაზე ეცვა.
კანიე უესტმა რასისტული შეურაცხყოფა მიაყენა Daily Show-ს წამყვან ტრევორ ნოეს, გააკრიტიკა კომიკოს D.L. Hughley-ის სტილი და პიტ დევიდსონთან მეგობრობის გამო მუსიკოსი Kid Cudi უხეშად მოიხსენია. თუმცა, კანიე უესტის ყველა მსგავსი პოსტი სოციალური ქსელებიდან უკვე წაშლილია.
