Bloom Music ქართული მუსიკალური კომპანიაა, რომელიც 2021 წელს დაარსდა და ისეთ სერვისებზეა ფოკუსირებული, როგორიც არის არტისტ მენეჯმენტი, მუსიკის ციფრული დისტრიბუცია და მუსიკის სინქრონიზაცია. Bloom Music ამჟამად სრული მოცულობით თანამშრომლობს ქართული მუსიკალური სცენის სამ წამყვან პროექტთან, ესენია: Killages, ერეკლე დეისაძე და Eko & Vinda Folio. ბოლო სამი წლის განმავლობაში კომპანიის სერვისის მეშვეობით 100-ზე მეტმა ქართველმა მუსიკოსმა საკუთარი შემოქმედების ციფრული დისტრიბუცია 60-ზე მეტ მუსიკალურ პლატფორმაზე შეძლო.
ახლახან Bloom Music-მა მნიშვნელოვანი სიახლე გაავრცელა. კომპანია მსოფლიოს წამყვანი მუსიკალური გამომცემლის – Sony Music Publishing-ის და გავლენიანი სპეციალიზებული კომპანიის – Extreme Music-ის ექსკლუზიური პარტნიორი გახდა. Sony Music Publishing-ის პოლონეთის ოფისთან პარტნიორობა სინქრონიზაციის უფლებას მოიცავს. ეს ქართულ სარეკლამო სააგენტოებს, სატელევიზიო სტუდიებს და კინოინდუსტრიის წარმომადგენლებს საშუალებას აძლევს, ლიცენზია აიღონ და თავისი პროექტებისთვის სასურველი მუსიკა უდიდესი მუსიკის კატალოგებიდან შეარჩიონ.
მირიან კულულაშვილი, Bloom Music-ის დირექტორი:
“Sony Music Publishing-თან ჩვენი პარტნიორობა ქართული მუსიკალური ინდუსტრიისთვის ერთ-ერთი მნიშვნელოვანი მომენტია, ვინაიდან ასეთი დონის კომპანიის საქართველოს ბაზარზე შემოსვლა კიდევ უფრო მეტ შესაძლებლობას მისცემს როგორც ადგილობრივ კომპანიებს, რომლებიც სარეკლამო, თუ სატელევიზიო სივრცეში მოღვაწეობენ, ასევე ქართველ შემოქმედებსაც. ეს ყველაფერი კიდევ უფრო მეტად აამაღლებს საავტორო უფლებების შესახებ ცნობიერებას და გააჯანსაღებს ადგილობრივ მუსიკალურ ეკოსისტემას.“
