10 თებერვალს, Live Nation Productions-მა ახალი კომედიური ფილმი დააანონსა, რომელიც რეჟისორ ლი კირკთან და Green Day-სთან თანამშრომლობით იქმნება. კომედიური ჟანრის ფილმი New Years Rev ახალგაზრდობის შესახებ გვიყვება, სადაც მთავარ როლებს მეისონ თეიმსი, კაილ კოფმანი და რაიან ფუსტი ასრულებენ. მათი პერსონაჟები ლოს-ანჯელესში იმ წარმოდგენით მიდიან, რომ მათ Green Day-ის კონცერტის გახსნის შესაძლებლობა მიეცემათ. ფილმი Green Day-ს პირველ ტურნეზე გატარებული პერიოდით არის შთაგონებული, როდესაც ისინი ამერიკაში ფურგონით მოგზაურობდნენ და სხვადასხვა ქალაქებში მცირე სცენაზე კონცერტებს მართავდნენ.
ფილმში ასევე მონაწილეობენ კომედიური სერიალის, The Office-ის მსახიობები ჯენა ფიშერი და ანჯელა კინსი, მთავარ როლებში კი – იგნასიო დიას-სილვერიო და კინ რუფალო არიან.
პრესრელიზში Green Day-ის ვოკალისტმა, ბილი ჯო არმსტრონგმა განაცხადა: „ფურგონში გატარებული ტურის დღეები საუკეთესოა. მთელ ღამეს უძილოდ ატარებ გზაში, მერე კი, მცირე აუდიტორიისთვის, ათამდე ადამიანისთვის გამოდიხარ სცენაზე მეგობრის ახლობლის სარდაფში, შენთვის უცნობ ადგილას. მაგრამ ამას მეორე და მომდევნო დღესაც გაიმეორებ, რადგან ეს შენი ბენდია – შენი ოჯახი. ეს დაუვიწყარი შეგრძნებაა. დაე, მუსიკა და აურზაური დაიწყოს!“
Live Nation Productions-ის ტელევიზიისა და ფილმების მიმართულების ხელმძღვანელმა, რაიან კროფტმა დაამატა: „Green Day-ის წარმოუდგენელი შემადგენლობით, New Years Rev ახალგაზრდა არტისტების ამბავს მოგვითხრობს, რომლებიც ოცნებას მისდევენ. ეს არის გრძელი, უძილო ღამეები, უსასრულო კილომეტრები და სცენაზე დამუხტული ენერგია, რომელიც მათ მოგზაურობას განსაზღვრავს. საოცარი მსახიობების შესრულებით, ეს ფილმი ცოცხალი მუსიკის ჯადოსნურ სამყაროს ასახავს.“
Live Nation-ს ჯერ არ გამოუცხადებია New Years Rev-ის გამოსვლის სავარაუდო თარიღი, თუმცა, ფილმის გადაღებები ამჟამად ოკლაჰომაში მიმდინარეობს.
