„ქართული მუსიკალური მემკვიდრეობა” რიგით მეცხრე გამოცემას აანონსებს. GML ამჯერად ჯგუფ „მწვანე ოთახის” ამავე სახელწოდების სადებიუტო ალბომს ხელახლა გამოსცემს. ალბომის პრეზენტაცია 6 მარტს Jazz Club 1984-ში შედგება.
„მწვანე ოთახი” ქართულ მუსიკალურ ინდუსტრიაში 1990-იანი წლების ბოლოს გამოჩნდა და იმ დროისთვის სრულიად განსხვავებული ჟღერადობით მალევე მოიპოვა პოპულარობა. 2001 წელს ჯგუფმა სადებიუტო ალბომი გამოსცა, სახელწოდებით „მწვანე ოთახი”. ალბომში შევიდა ისეთი ცნობილი ჰიტები, როგორებიცაა „მისები”, „ჩემთან აღარ ხარ” და სხვ.
„ამ ალბომის გავლენა ღრმა იყო. ეს იყო ბენდის უნიკალური სტილის დეკლარაცია და ქართული მუსიკის განმსაზღვრელი მომენტი, რომელიც აღნიშნავდა გადასვლას უფრო მრავალფეროვანი და ექსპერიმენტული ხმოვანებისკენ. „მწვანე ოთახის” წარმატება აჩვენებდა საქართველოში ინოვაციური მუსიკის მზარდ მოთხოვნას და მოამზადა ასპარეზი მომავალი მუსიკალური ექსპერიმენტებისთვის,” – ვკითხულობთ „ქართული მუსიკალური მემკვიდრეობის” მიერ გავრცელებულ განცხადებაში.
