Nine Inch Nails-მა ფანებს სიურპრიზი გაუკეთა. ინდუსტრიული როკის შეუჩერებელმა ძალამ ახალი სიმღერა გამოსცა, სახელწოდებით As Alive As You Need Me to Be. ამასთანავე დააანონსა, რომ Tron: Ares-ის საუნდტრეკი 19 სექტემბერს გამოვა.
As Alive As You Need Me to Be ბენდის პირველი ახალი მუსიკაა ბოლო ხუთი წლის განმავლობაში და პირველი სინგლია Tron: Ares-ის საუნდტრეკიდან, რომელიც გრემის მფლობელი ბენდის ყველა ახალ ნამუშევარს მოიცავს.
მიუხედავად იმისა, რომ ბენდს ახალი სიმღერა ოფიციალურად არ დაუანონსებია, ფანები მის გამოცემას ეჭვობდნენ. 10 დღით ადრე შოუებზე მათ შეამჩნიეს გასაყიდი მაისურები წარწერით as alive as you need me to be. 8 ივლისს კი მაისურის ფოტო ინსტაგრამზე თავად ბენდმაც გააზიარა, ყოველგვარი დამატებითი ინფორმაციის გარეშე.
საუნდტრეკის წინასწარი შეკვეთა უკვე შესაძლებელია. თავად ფილმი კინოთეატრებში 10 ოქტომბერს გამოვა.
Tron: Ares-ის საუნდტრეკის გამოცემასთან ერთად ტრენტ რეზნორი და მისი მუსიკალური პარტნიორი ატიკუს როსი ამჟამად ფრენჩაიზის მესამე ფილმის მუსიკაზე მუშაობენ. დუეტს მუსიკალურად ჯამში 20 ფილმი აქვს გაფორმებული, მიღებული აქვს ორი ოსკარი (The Social Network-ისთვის 2011 წელს და Soul-ისთვის 2021 წელს) და სამი ოქროს გლობუსი (ფილმებისთვის The Social Network, Soul და Challengers).
ამჟამად Nine Inch Nails მსოფლიო ტურნეში იმყოფება, რომელიც სექტემბერში დასრულდება.
მოუსმინეთ სიმღერას As Alive As You Need Me to Be:
