ახლახან The Guardian-მა ინტერვიუ ჩაწერა ჰიპ-ჰოპ დუეტთან – The Clipse-თან, რომლის წევრები ძმები, Pusha T და Malice არიან. The Guardian-მა სცადა Pusha T-ისთან გაერკვია, კიდევ ითანამშრომლებს თუ არა ოდესმე კანიე უესტთან.
„ეს უკვე წარსულია. ეს ნამდვილად წარსულია,“ – მოკლედ და პირდაპირ უპასუხა მან.
ამ კონკრეტული კითხვის დასმამდე ჟურნალისტმა ჰკითხა, შეძლებდა თუ არა დაესახელებინა გამორჩეულად კარგი მომენტები G.O.O.D. Music-ის წევრობის პერიოდიდან.
„იქ ყოფნა განსაკუთრებული იყო. So Appalled-ისა და New God Flow-ს შექმნა ჩემი ერთ-ერთი საყვარელი მოგონებაა. G.O.O.D. Friday-ს სერია კი საერთოდ საოცრება იყო. ის ალბომები, რაც იმ პერიოდში გამოვუშვი – Daytona და It’s Almost Dry – ძალიან ძლიერი ნამუშევრებია. ცხადია, რომ მე და Ye-მ ერთად დიდი საქმეები გავაკეთეთ.“
ბოლო წლების განმავლობაში Pusha-ს და Ye-ს (კანიე უესტი) ახლო ურთიერთობა აღარ აქვთ. Pusha-მ ჟურნალ GQ-ს უთხრა, რომ თავის ყოფილ კოლაბორატორს ვეღარ ცნობდა და, თითქოს, ის სხვა ადამიანია. ეს კომენტარი Pusha-მ მას შემდეგ გააკეთა, რაც Ye-მ სოციალურ ქსელში დაწერა, რომ წარსული მეგობრობა ენატრებოდა.
ინტერვიუს ბოლოს The Clipse-ის წევრებს სთხოვეს, ყველა დროის საყვარელი ალბომები დაესახელებინათ. Malice-ის პასუხები ნაწილობრივ იმ მუსიკას ეხებოდა, რომელსაც, მისივე თქმით, ვარჯიშის დროს უსმენს.
„მე მიყვარს The Killers, მიყვარს Red Hot Chili Peppers, ბილი ჯოელიც კი,“ – თქვა Malice-მა. „როცა სპორტდარბაზში ვვარჯიშობ, ჩართული მაქვს Coldplay ან U2-ს The Joshua Tree. სასაცილოა, მაგრამ როდესაც 1980-იან წლებში MTV-ს ვუყურებდი, ეთერში სულ დევიდ ბოუი იყო. ამ წლების შემდეგაც ბოუი ჩემთვის ისევ წინა ხაზზეა. ვფიქრობ, ეს ბევრს ამბობს ნამდვილ ტალანტზე – როგორ შეიძლება მან დროს და თაობებს გაუძლოს.“
Pusha-ს რჩეული მუსიკა უფრო ჰიპ-ჰოპ ჟანრს მოიცავს: „მე მუდამ ვტრიალებ Mobb Deep-ის The Infamous-სა და Raekwon-ის Only Built 4 Cuban Linx-ს შორის, ასევე Jay-Z-ის Reasonable Doubt-ისა და Biggie-ს Life After Death-ს შორის. მსოფლიოში სადაც არ უნდა წავიდე, ამ ოთხ ალბომთან ერთად ბედნიერი ვიქნები.“
