კეროლ ჯიმ ახალი ალბომი დააანონსა და ის მომავალ კვირას გამოვა. ლათინოამერიკელმა სუპერვარსკვლავმა 29 ივლისს ტორონტოში გამართულ კონცერტზე ფანებს სიურპრიზი გაუკეთა და ახალი პროექტი No Me Arrepiento De Sentir Tanto ოფიციალურად დააანონსა. ჩანაწერი 2025 წელს გამოსული Tropicoqueta-ს გაგრძელებაა. ალბომი 7 აგვისტოს გამოვა.
ტორონტოში, Rogers Stadium-ზე გამართული კონცერტით კეროლ ჯი პირველი ქალი სოლო არტისტი გახდა, რომელმაც ამ სტადიონზე ჰედლაინერის სტატუსით იმღერა. შოუს განმავლობაში მან ფანები ახალი ალბომის სახელითა და გამოცემის თარიღის დაანონსებით გააოცა, ასევე სტადიონის ეკრანებზე ალბომის ყდის დიზაინიც გააზიარა.
„ტორონტო, თქვენთვის ერთი განცხადება მაქვს და შემდეგ საჩუქარიც გელოდებათ. რამდენიმე თვეა, რაც ერთ პროექტზე ვმუშაობ. თვეებია, ჩაკეტილი ვარ და ახალ მუსიკას ვქმნი. ამავდროულად, ვამზადებდი სეგმენტს, რომელიც ამ ტურნეს ნაწილი გახდება. მინდა, დავაანონსო, რომ 7 აგვისტოს ჩემი ახალი ალბომი გამოვა. ეს არის ალბომი, რომელსაც, ერთი სული მაქვს, თქვენთან ერთად როდის ვიმღერებ. მისი სახელია No Me Arrepiento de Sentir Tanto.”
ახალი კრებული ამ ხნის განმავლობაში ხელის გულზე იმალებოდა. 24 ივლისს, ტურნეს გახსნის დღეს, არტისტმა ახალი სინგლი Matadora გამოსცა. მიუხედავად იმისა, რომ მომავალ ალბომში შემავალი სიმღერების სია ჯერ არ გამოქვეყნებულა, მოსალოდნელია, რომ მასში Matadora-ც იქნება.
Live Nation-ის ორგანიზებულ ტურნეში, კეროლს უერთდებიან ბეკი ჯი, Greeicy და ელენა როუზი. ტურნე Tropicoqueta-ს მხარდასაჭერად იმართება, რომელმაც ლათინური ალბომების ჩარტის პირველი, ხოლო Billboard 200-ის მესამე პოზიცია დაიკავა. ალბომის ყველა, ოცივე სიმღერა კი ლათინური სიმღერების ჩარტში შევიდა.
ტურნეს შემდეგი გაჩერება 2 აგვისტოს ვაშინგტონშია.
