Kehlani მსოფლიო ტურნეს დროებით აჩერებს და ჯანმრთელობის მდგომარეობის აღდგენაზე კონცენტრირდება. გრემის მფლობელმა მომღერალმა 26 აგვისტოს სოციალურ ქსელში განაცხადა, რომ Kehlani World Tour-ის ფარგლებში დაგეგმილ მომდევნო ორ კონცერტს ნიუ ჯერსისა და მერილენდში აუქმებს. ამის მიზეზად კი მისი ჯანმრთელობის მდგომარეობის გაუარესება და ჰოსპიტალიზაცია სახელდება.
„ორი დღე ვისვენებდი და თავს სრულიად ნორმალურად ვგრძნობდი. მაგრამ შემდეგ მთელი ღამე არ მიძინია, ყლაპვა მიჭირდა და საშინელი ტკივილები მქონდა, ახლახან დავტოვე საავადმყოფო და ექიმებმა მომდევნო ორ კონცერტზე სიმღერის უფლება არ მომცეს. ძალიან ვწუხვარ ამის გამო,“ – დაწერა მომღერალმა.
არტისტმა განაცხადა, რომ ტურნე 29 აგვისტოს ვირჯინიის შტატის ქალაქ რიჩმონდში, Allianz Amphitheater at Riverfront-ზე განახლდება.
„გული მწყდება, რომ ამის გაკეთება მიწევს. ყველაფერს ვაკეთებ იმისთვის, რომ ჩემი ჯანმრთელობა მწყობრში ჩადგეს, თუმცა გარანტირებული მაინც არაფერია. ტურნეს ვირჯინიიდან გავაგრძელებთ.“ – წერს Kehlani.
ტურნეს განმავლობაში Kehlani ყოველთვის განსაკუთრებულ ყურადღებას უთმობდა ჯანმრთელობასა და ფსიქოლოგიურ მდგომარეობას. ჩრდილოეთ ამერიკაში ტურნეს დროს ის სხვადასხვა სპა სალონს, იოგა სტუდიასა და გამაჯანსაღებელ ცენტრებს სტუმრობდა.
ტურნეს დასრულებამდე ჯერ კიდევ დიდი დროა, კონცერტები სექტემბრის განმავლობაში გაგრძელდება და ოქტომბრის დასაწყისში, სან-ფრანცისკოში გამართული შოუთი დასრულდება.
2026 წელს Kehlani Billboard-ის R&B/Hip-Hop Power Players ნომრის გარეკანზე მოხვდა. გამოცემაში მომღერალი თავის მეგობარსა და კოლეგას, ლეონ თომასს ესაუბრა, სადაც უარყო მოსაზრება, თითქოს R&B ჟანრი კვდება.
„მძულს მოსაზრება, რომ თითქოს R&B მოკვდა, ის არსად წასულა. ადამიანები უბრალოდ ცოტა ზარმაცობენ და ახალი შემსრულებლების აღმოჩენას, მათ მოსმენასა და გაცნობას აღარ უთმობენ დიდ დროს. ახალი მუსიკა ყველგანაა, სადაც არ უნდა გაიხედოთ. მე ყოველდღე ვპოულობ ვინმე ისეთს, ვინც მომწონს.“- აღნიშნა მან.
31 წლის მომღერალმა აპრილში საკუთარი სახელწოდების ალბომი გამოსცა, რომელმაც Top R&B Albums ჩარტში პირველი ადგილი დაიკავა და Billboard 200-ში საუკეთესი-ხუთეულში მოხვდა.
Billboard-ი დამატებითი კომენტარისთვის Kehlani-ს წარმომადგენლებს დაუკავშირდა.
