26 იანვარს, პარიზში Opération Pièces Jaunes-ის სახელით ცნობილმა ფრანგულმა ფონდმა კონცერტი გამართა. ფონდის მიზანი იმ ბავშვების და მოზარდების დახმარებაა, რომლებიც სამედიცინო დახმარებას საჭიროებენ. საქველმოქმედო კონცერტზე მონაწილეობა არაერთმა ცნობილმა ვარსკვლავმა მიიღო, მათ შორის არიან Asap Rocky, Blackpink-ის ლისა, Maroon 5 და სხვები.
აღნიშნულ ღონისძიებამდე Élysée Palace-ში ოფიციალური მიღება გაიმართა, რომელსაც პოპ კულტურის ვარსკვლავებთან ერთად, საფრანგეთის პრეზიდენტი მაკრონიც ესწრებოდა. საღამოზე მიწვეულ სტუმრებს შორის იყო ქართველი პიანისტი, ხატია ბუნიათიშვილი. ახლახან პიანისტმა საკუთარი ინსტაგრამის ანგარიშზე ამ საღამოს გადაღებული ფოტოები გამოაქვეყნა.
ბუნიათიშვილი ფოტოებზე აღბეჭდილია ისეთ პერსონებთან ერთად, როგორებიც არიან ემანუელ მაკრონი, ბრიჯიტ მაკრონი, რიანა და მოდის ყველაზე გავლენიანი კონგლომერატის – LVMH-ის მფლობელი ოჯახის წარმომადგენელი, ჰელენ მერსიე-არნო.
აღსანიშნავია, რომ ეს საღამო ბევრი დეტალით იყო გამორჩეული და სოციალურ მედიაში ღონისძიებაზე გადაღებული მრავალი ფოტო გავრცელდა. ასეთი საჯარო ყურადღების მიზეზი, პირველ რიგში, რიანას პარიზში საჯარო გამოჩენაა.
რაც შეეხება ხატია ბუნიათიშვილის საერთაშორისო კარიერასა და მის პერსონას, პიანისტი არაერთხელ გვინახავს მსოფლიო პრესის ფოკუსში. 2022 წელს ბუნიათიშვილი ვენეციის კინოფესტივალის წითელ ხალიჩაზე გამოჩნდა, იქამდე კი Cartier-ის სახე გახდა. ამასთანავე აღსანიშნავია, რომ პიანისტს შემოქმედებითი თანამშრომლობა მუსიკალური ინდუსტრიის არაერთ ცნობილ წარმომადგენელთან აკავშირებს, მათ შორის არის Coldplay.
ნახეთ Opération Pièces Jaunes-ის გალა კონცერტის ოფიციალური ჩანაწერი.
