ჯერ კიდევ 2025 წლამდე არაერთმა არტისტმა მიანიშნა ახალ ალბომზე. ზოგი ღიადაც ამბობდა, რომ მომდევნო წელს მსმენელები ახალ ნამუშევრებს მოისმენდნენ.
მაგალითად The Weeknd-მა 2024 წლის 7 იანვარს ინსტაგრამზე გამოაქვეყნა ე.წ. კარუსელი, სადაც განთავსებული იყო After Hours-ის და Dawn FM-ის ალბომის ყდები, მათ შემდეგ კი – შავი კვადრატი, შუაში თეთრი კითხვის ნიშნით. აღწერაში არტისტმა მიუთითა მხოლოდ ერთი ციფრი: „3“. სექტემბერში მუსიკოსმა საბოლოოდ გაამხილა თავისი ტრილოგიის მესამე ალბომის სახელი – Hurry Up Tomorrow და გამოცემის თარიღიც გაასაჯაროვა. თუმცა 13 იანვარს The Weeknd-მა დააანონსა, რომ ლოს ანჯელესის მახლობლად მომხდარი დამანგრეველი ხანძრების გამო ალბომის გამოსვლასაც გადადებდა.
შემდეგ იყო ლედი გაგა. რომელმაც Gaga Chromatica Ball-ის საკონცერტო ფილმის ბოლოს წარადგინა წარწერა: „LG7 GAGA RETURNS“. ეს იმას ნიშნავდა, რომ გაგას მეშვიდე ალბომი მზადდებოდა. თუმცა HBO Max-ის ფილმში ამ ფრაზის გარდა არაფერი იყო ნათქვამი, მათ შორის, საიდუმლოდ დარჩა ნამუშევრის გამოცემის თარიღი. მხოლოდ სექტემბერში, Vogue-ის ყდაზე გამოჩენისას, გაგამ გაამხილა, რომ LG7 2025 წლის თებერვალში გამოვიდოდა. საბოლოოდ, მუსიკოსის ახალი ალბომი, სახელწოდებით Mayhem 7 მარტს გამოვიდა.
ჯო ჯონასმა ჯერ 2024 წლის ივლისში განაცხადა, რომ თავისი სოლო ალბომი Music for People Who Believe in Love 18 ოქტომბერს გამოვიდოდა, თუმცა სექტემბერში X-ზე დაწერა, რომ გამოსვლის თარიღი გადაიდო, რადგანაც ალბომს ხელის შევლება და ბოლო შტრიხების შეტანა სჭირდებოდა. საბოლოოდ, ალბომი 23 მაისს გამოვიდა.
როდესაც საქმე მოულოდნელ ანონსებს და ალბომების სიმრავლეს ეხება, რთული ხდება, სიახლეების ზედმიწევნით მიჰყვე. ამიტომ Billboard-მა შექმნა 2025 წლის ახალი ალბომების კალენდარი, რომელიც რეგულარულად განახლდება და მოიცავს ყველაზე მნიშვნელოვან გამოცემებს ყველა ჟანრში: ჰიპ-ჰოპიდან K-pop-ამდე, ლათინურიდან როკ-ენ-როლამდე, პოპიდან ქანთრიმდე.
2025 წლის ახალი ალბომების კალენდარი იხილეთ ბმულზე.
