მარჯანიშვილის თეატრში მსოფლიო თეატრის პატრიარქად წოდებული თეოდოროს ტერზოპულოსის სპექტაკლი გაიმართა. წარმოდგენა სახელწოდებით Amor ფესტივალ „საჩუქრის” გახსნითი ღონისძიება იყო.
Amor – ეს არის ემოციებით დატვირთული სპექტაკლი, სადაც წარმოდგენილია თანამედროვე ადამიანისა და საზოგადოების მომავალი, რომელსაც მაყურებელი უკვე აწმყოშიც ამოიცნობს. ეს არის სამყარო, სადაც თავად ადამიანიც სამომხმარებლო საგანი ხდება და ჰყიდის ყველაფერს, მათ შორის საკუთარ თავსაც. რეჟისორის ორიგინალური გადაწყვეტით, დარბაზში შესულ მაყურებელს მსახიობები უკვე სცენაზე ხვდებიან, როგორც გასაყიდად გამოტანილი ნივთები. „აქ, ამ სცენაზე, ევროპის ძირში ვყიდი ყველაფერს!” – არაერთხელ იმეორებს ფრაზას სპექტაკლის პერსონაჟი. თუმცა ყველაზე მეტი, რაც ერთსაათიანი წარმოდგენის დროს ისმის, მხოლოდ ციფრებია.
თეოდოროს ტერზოპულოსი:
„ეს არის ჩვენი აწმყოც და მომავალიც. უფრო სწორად რომ ვთქვათ, ეს არის მომავლის ანარეკლი აწმყოში. იმ მომავლისა, რომელიც ნელ-ნელა დგება. ეს არის პროცესი დეჰუმანიზაციისა, ანუ ადამიანობისგან დაცლისა. ადამიანი ხდება ციფრი და ჰყიდის ყველაფერს. დღეს ჩვენ რეალურად ბანკების ტყვეები ვართ, რადგან სწორედ ისინი მართავენ სამყაროს. თუმცა ეს არ ეხება მხოლოდ ბანკებს. რაც დღეს ხდება, ეს არის კატასტროფის პროცესი, განადგურების პროცესი… ძალიან ბევრი რამ არის შიგნით და ჩვენ ვართ ამ ყველაფრის მონაწილე და ტყვე. ეს არ არის დრამატული სპექტაკლი. მას არ აქვს დრამატული ხასიათი. ეს უფრო მეტად არის პოლიტიკური მანიფესტაცია.”
ორი მსახიობითა და მინიმალისტური სცენოგრაფიით, ტექსტზე ორიენტირებული სპექტაკლი დღევანდელ სოციალურ-პოლიტიკურ მოვლენებსაც ეხმიანება. ომი, ავადმყოფობა, კორონავირუსი – ეს ის თემებია, რომლებსაც მსახიობები ციფრებს შორის აჟღერებენ. სპექტაკლის დროს ბევრჯერ მეორდება ფრაზა: „გასასვლელი არ არის.” თუმცა საბოლოოდ რეჟისორი ამ რეალობიდან თავის დაღწევის თავის გზას გვაჩვენებს. პერსონაჟები პასუხს პოულობენ და ეს არის სიყვარული – Amor.
„სიყვარული არის ძალიან მშვენიერი, ლამაზი, მაგრამ ძალიან იშვიათი გზა იმისთვის, რომ გამოსავალი იპოვო,” – ამბობს ტერზოპულოსი. „თეატრის მისია და მიზანი ის არის, რომ რაღაც შეცვალოს ადამიანში, რომ სხვა თვალით შეხედოს მოვლენებსა და საგნებს. მსახიობები აქ იმისთვის გარდაისახებიან, რომ მაყურებელიც გარდაისახოს.”
სპექტაკლმა მაყურებლის დიდი ოვაციები დაიმსახურა. Amor ტერზოპულოსის ტრილოგიის მეორე ნაწილია. პირველი – Alarme „საჩუქრის” ფარგლებში ქართველმა მაყურებელმა შარშან იხილა. ტრილოგიის დასკვნითი სპექტაკლის Encore-ის ჩვენება კი მომავალ წელს ისევ ფესტივალის სცენაზე იგეგმება.
ფესტივალის პროგრამა ნახეთ ბმულზე.
