ლეგენდარული მუსიკოსი ჯონ ლენონი მხოლოდ The Beatles-ის წევრი როდი იყო – ის იყო ასევე ნიჭიერი კომპოზიტორი, რომელმაც სოლო კარიერის დროს, 1973 წელს, შექმნა კლასიკად აღიარებული სტუდიური ალბომი Mind Games. ალბომში შესული სიმღერები 1973 წელს ბილბორდ 100-შიც მოხვდა, მათ შორის ალბომის სათაურის მატარებელი ტრეკი, რომელიც ჩარტებში 13 კვირის განმავლობაში პოზიციონირებდა. მიუხედავად იმისა, რომ მრავალი მუსიკალური წიგნი არსებობს, რომლებიც ჯონ ლენონის ცხოვრებას სიღრმისეულად ასახავს, ახალი წიგნი გულშემატკივრებს საშუალებას აძლევს, ექსკლუზიურად იხილონ Mind Games-ის შექმნის პროცესი. წიგნში შესულია აქამდე უცნობი ფოტოები, ჯონ ლენონისა და იოკო ონოს ხელნაწერი წერილები.
წიგნი Mind Games 24 სექტემბერს გამოიცა და უკვე გულშემატკივრებისა და მელომანების დადებითი შეფასებაც დაიმსახურა. წიგნი Amazon-ის ბესტსელერების სიაში პირველ ადგილს იკავებს.
ჯონ ლენონის მეოთხე სოლო ალბომზე შექმნილი წიგნის, Mind Games-ის 288 გვერდზე წარმოდგენილია აქამდე გამოუქვეყნებელი, ექსკლუზიური ფოტოები. ლეგენდარული მუსიკოსის გულშემატკივრები წიგნში დეტალურად გაეცნობიან ალბომის შექმნის, ჩანაწერებისა და სიმღერების წერის პროცესს.
წიგნი ასევე მოიცავს ჯონ ლენონის შესახებ იმ პერიოდში გამოქვეყნებულ საგაზეთო სტატიებსაც. Mind Games-ში მკითხველი ალბომის შესახებ ჯონ ლენონის მეგობრების, მუსიკოსებისა და სხვა მნიშვნელოვანი ადამიანების მოსაზრებებს გაეცნობა. აღსანიშნავია, რომ წიგნის გამოცემასთან ერთად დაგეგმილია ალბომის განახლებული ვერსიის გამოშვებაც, რომელიც მიზნად ისახავს ახალი თაობის მსმენელთათვის ამ მუსიკის გაცნობას.
