18 იანვარს „ეარში” პირველი საქველმოქმედო მუსიკალური საღამო გაიმართა, სახელწოდებით „მუსიკოსები მუსიკოსებისთვის”. ღონისძიების პირველი სტუმარი მუსიკოსი და მწერალი აინე მერმე (ნატუკა ნაცვლიშვილი) იყო. საქველმოქმედო სერიის ძირითადი მიზანი იმ მუსიკოსების დახმარებაა, რომლებიც საქართველოში ბოლო დროს განვითარებული მოვლენების შედეგად დაზარალდნენ.
აინე მერმე (ნატუკა ნაცვლიშვილი) – მუსიკოსი
„მუსიკალური საღამოების ეს სერია პრინციპში ზუსტად იმ იდეის გაგრძელებაა, რისთვისაც ეს სივრცე შეიქმნა. როგორც ზედა „ეარი“, ანუ წიგნების მაღაზია და კაფე, ისე ქვედა სივრცე „კარი ეარში”, რომელიც ჩანაფიქრში იყო ჯადოსნური პატარა მუსიკალური საღამოების, შეხვედრებისა და კინოჩვენებისთვის. ჩვენთვის ყველასთვის ძალიან რთულ ვითარებაში თვალსაჩინო გახდა, თუ რამდენად გვჭირდება შეკრება, აზრის გაზიარება, თანადგომა, რაღაცების დაგეგმვა და აქტივობა. ხელოვნების ხალხი ასეთ პერიოდში ერთ-ერთი ყველაზე მოწყვლადი რგოლია და უნდა ითქვას, რომ ფინანსური სახსრები ქრება ფაქტობრივად მათთვის, ამიტომ გადავწყვიტეთ, რომ სიმბოლურად იმ მუსიკოსებისთვის, რომლებსაც ეს სჭირდებათ, შეგვექმნა სივრცე, სადაც შეეძლებათ თვითგამოხატვა.”
ნინო ლომაძე – „ეარის” დამფუძნებელი
„მუსიკოსებისთვის ყველგან ამას ვამბობთ, რომ ეს მათი ჩვეულებრივი სამუშაოა, ეს არის მათი პროფესია, ეს არის მათი საქმე. თუ სხვები მუსიკას აღიქვამენ გასართობ, სარელაქსაციო, საზეიმო განწყობის შესაქმნელ ატრიბუტად, მუსიკოსებისთვის ეს არის საქმე. ამიტომ, მუსიკოსებისთვის, როგორც მხარდაჭერა, ისე წარმოგვიდგენია ამ ციკლის იდეა.”
„ეარის” საქველმოქმედო კონცერტების პირველი სერია 18 იანვარს გაიმართა, სადაც მსმენელის წინაშე მუსიკოსი და მწერალი აინე მერმე წარდგა. როგორც „ეარის” დამფუძნებლები ამბობენ, ამ ღონისძიებებს ციკლის სახე მიეცემა და ყოველ შაბათს გაიმართება. მუსიკოსებს კი, ვისაც სურვილი ექნებათ საქველმოქმედო ღონისძიების სერიაში ჩართვის, „ეარის” საშუალებით, შესაძლებლობა ექნებათ, დაგეგმონ კონცერტი.
დამოუკიდებელი, შემოქმედებითი სივრცის „ეარის” ძირითადი მიზანიც ეს არის, სადაც შემოქმედები პროცესების, ახალი იდეების და აზრის გაზიარების, თანადგომის და თანაგანცდის შეგრძნება, ადამიანს ამ სივრცეში შესვლისთანავე ეუფლება.
