The Beatles-ის ბიოგრაფიული ფილმებისთვის კასტინგის შემდეგ მსახიობები შეირჩნენ, სადაც ჯონ ლენონის როლს ჰარის დიკინსონი, პოლ მაკარტნის – პოლ მესკალი, რინგო სტარს – ბარი კეოგანი, ხოლო ჯორჯ ჰარისონს – ჯოზეფ ქუინი შეასრულებს.
Sony Pictures ახალ პროექტს იწყებს რომლის ამჟამინდელი სახელწოდებაა The Beatles – A Four Film Cinematic Event. ფილმების რეჟისორი სემ მენდესია. მისი თქმით, თითოეული ჯგუფის წევრზე გადაღებული ოთხივე ბიოგრაფიული ფილმის პრემიერა 2028 წლის აპრილში შედგება.
კასტინგის დადასტურების შესახებ ინფორმაცია რეჟისორმა სემ მენდესმა და ვარსკვლავურ მსახიობთა ოთხეულმა 31 მარტს ლას-ვეგასში, CinemaCon-ზე გააჟღერეს.
რეჟისორმა აღნიშნა, რომ ოთხი ფილმი ბენდის თითოეული წევრის უფრო ღრმა, შინაარსობრივ მხარეს წარმოაჩენს: „The Beatles-მა კულტურა რადიკალურად შეცვალა და მთელი ცხოვრების განმავლობაში თქვენთან დარჩა. ეს ყველა დროის ყველაზე მნიშვნელოვანი ბენდია.“
რეჟისორის თქმით, იგი The Beatles ფილმის გადაღებას წლების განმავლობაში ცდილობდა, თუმცა ერთი ფილმის ფორმატში ამ ისტორიის მოყოლა შეუძლებელი იყო და ტელესრიალის გადაღებაც არ სურდა.
„აუცილებლად უნდა ყოფილიყო გზა, რომ ეს ეპიკური ისტორია ახალი თაობისთვის მოგვეთხრო. მერწმუნეთ, ჯერ კიდევ უამრავი რამაა გამოსაკვლევი და მგონია, რომ ამისთვის გზა გამოვნახეთ.“
ამ კასტინგის შესახებ ჭორები ბოლო რამდენიმე თვის განმავლობაში აქტიურად ვრცელდებოდა. გასულ წელს რინგო სტარმა აღნიშნა, რომ ბარი კეოგანი მის როლს მოირგებდა: „მგონი, სადღაც დასარტყამებზე დაკვრას სწავლობს, იმედი მაქვს, არც ისე ბევრს,“ – იხუმრა მან.
გარდა ამისა, რიდლი სკოტმა, რომელმაც პოლ მესკალი მთავარ როლში გადაიღო, შემთხვევით გაამხილა მსახიობის მონაწილეობა ბითლზის ბიოგრაფიულ ფილმში.
ჰარის დიკინსონი ყველაზე მეტად ცნობილია თავისი როლებით ფილმებში Babygirl (2024) და The Iron Claw (2023), ხოლო ჯოზეფ ქუინმა პოლ მესკალთან ერთად Gladiator II-ში მიიღო მონაწილეობა და ასევე გამოჩნდა სერიალ Stranger Things-ის ბოლო სეზონში.
აღსანიშნავია, რომ ოთხი ბიოგრაფიული ფილმი The Beatles-ის კარიერის მთელ გზას ასახავს, 1960 წელს ბენდის ფორმირებიდან საკონცერტო და სტუდიური პერიოდის ჩათვლით. ბენდს დღემდე ეკუთვნის ორი დიდი რეკორდი: ყველაზე მეტი №1 ალბომი Billboard 200-ზე (19 ალბომი) და ყველაზე მეტი №1 სინგლი Billboard Hot 100-ზე (20 ჰიტი).
The Beatles-ზე აქამდეც არაერთი დოკუმენტური და მცირე ბიუჯეტიანი მხატვრული ფილმია გადაღებული: 2009 წელს ფილმი Nowhere Boy გამოვიდა, რომელიც ჯონ ლენონის ახალგაზრდობას ეძღვნებოდა, მთავარ როლს კი აარონ ტეილორ-ჯონსონი ასრულებდა.
2022 წელს კინოეკრანებზე The Beatles: Get Back გამოვიდა, სადაც პიტერ ჯექსონმა ბენდის სტუდიური სესიებიდან აქამდე გამოუქვეყნებელი კადრები გამოიყენა და Disney+-ისთვის რვასაათიანი დოკუმენტური ფილმი შექმნა.
