3 დეკემბერს Spotify-მ თავისი ყოველწლიური ე.წ. Wrapped ფუნქცია გაააქტიურა, რაც მომხმარებლებს შესაძლებლობას აძლევს, მათ მიერ ყველაზე ხშირად მოსმენილი არტისტების რეიტინგი იხილონ. თეთრი სახლის პრესმდივანმა კაროლინ ლივიტმა ინსტაგრამის სთორიზე 2025 წლის მისი ტოპ ხუთი შემსრულებელი გააზიარა. პირველი ოთხეული შედგებოდა მორგან უოლენის, ფორესტ ფრანკის, ბრენდონ ლეიკისა და ენ უილსონისგან. მე-5 ადგილზე ლიბერალი პოპვარსკვლავი ტეილორ სვიფტი იყო.
მიუხედავად იმისა, რომ ლივიტი სვიფტის ერთ-ერთი ყველაზე მოულოდნელი მსმენელია, ის წელს ერთადერთი არ ყოფილა. 2025 წლის მონაცემებით, ტეილორ სვიფტი Spotify-ზე ყველაზე პოპულარული არტისტია შეერთებულ შტატებში, ასევე მსოფლიოში მეორე ყველაზე ხშირად მოსმენილი შემსრულებელი Bad Bunny-ს შემდეგ.
ეს სტატისტიკა აშკარად ეწინააღმდეგება პრეზიდენტ დონალდ ტრამპის ამ წლის დასაწყისში გაკეთებულ განცხადებას, რომ სვიფტი აღარ არის ისეთი პოპულარული, როგორც ადრე. „ვინმემ შენიშნა, რომ მას შემდეგ, რაც მე ვთქვი, რომ მძულს ტეილორ სვიფტი, ის აღარ არის პოპულარული?“ – დაწერა ტრამპმა Truth Social-ზე 2025 წლის მაისში.
აშშ-ის პრეზიდენტმა ასევე მიანიშნა, რომ სვიფტის მიერ დემოკრატი პოლიტიკოსების მხარდაჭერა და მისი დაპირისპირება ტრამპის ადმინისტრაციის მიმართ, რესპუბლიკელ ფანებს აიძულებდა, ბოიკოტი გამოეცხადებინათ მისი მუსიკისთვის. მას შემდეგ, რაც მომღერალმა საპრეზიდენტო არჩევნებში მხარი დაუჭირა კამალა ჰარისს, ტრამპმა განაცხადა: „მე არ ვიყავი ტეილორ სვიფტის ფანი. ეს მხოლოდ დროის საკითხი იყო… ის ძალიან ლიბერალი ადამიანია და როგორც ჩანს, ყოველთვის დემოკრატს უჭერს მხარს. ალბათ მას ამის ფასის გადახდა მოუწევს ბაზარზე.“
