13 დეკემბრის მონაცემებით, Zootopia 2-ის საუნდტრეკი Billboard-ის საბავშვო ალბომების ჩარტში მე-6 ადგილზეა, ხოლო ვინს გუარალდის საუნდტრეკი A Charlie Brown Christmas-ისთვის რეკორდს აუმჯობესებს და უკვე 125 არათანმიმდევრული კვირაა, N1 პოზიციაზე ან ჩარტის სათავეში იმყოფება.
Zootopia 2 ამავე სახელწოდების ანიმაციური ფილმის თანმხლები ალბომია, რომელიც კინოთეატრებში 26 ნოემბერს გამოვიდა და აშშ-სა და კანადაში ბილეთების გაყიდვით 220 მილიონ დოლარზე მეტი გამოიმუშავა. Zootopia 2 2016 წლის ფილმის, Zootopia-ს გაგრძელებაა, რომელმაც საუკეთესო ანიმაციური ფილმისთვის ოსკარი მოიპოვა და 2016 წლის ერთ-ერთ ყველაზე შემოსავლიან ფილმად იქცა.
მიუხედავად იმისა, რომ Zootopia-ს პირველი ალბომი საბავშვო ალბომების ჩარტში ვერ მოხვდა, მან საუნდტრეკების ჩარტში მერვე ადგილი, ხოლო Billboard 200-ის მრავალჟანრულ ჩარტში 121-ე პოზიცია დაიკავა.
აღსანიშნავია, რომ Zootopia 2-ის საუნდტრეკი ძირითადად მაიკლ ჯაკინოს მიერ დაწერილი მუსიკაა. ალბომში ერთი ახალი სიმღერაც – Zoo შედის, რომელსაც Shakira ასრულებს. იგი ფილმის ორივე ნაწილში პოპვარსკვლავ პერსონაჟ გაზელს ახმოვანებს. სიმღერა Zoo სპეციალურად ფილმისთვის Shakira-მ, ედ შირანმა და ბლეიკ სლატკინმა შექმნეს და ის ციფრული სიმღერების გაყიდვების ჩარტში მე-6 ადგილზე პოზიციონირებს.
საბავშვო ალბომების უახლესი ჩარტის ტოპ ათეულში სამი საახალწლო რელიზია, პირველ ადგილზე A Charlie Brown Christmas-ის საუნდტრეკია, მეორეზე კი Dr. Seuss-ის How the Grinch Stole Christmas! ჩარტში Christmas With The Chipmunks-ის (შობა თახვებთან ერთად) ალბომმა კი 24-დან მე-8 ადგილზე გადმოინაცვლა.
